أعرب رئيس الهيئة الوطنية لمكافحة الفساد "نزاهة" محمد الشريف عن إعجابه بشعر نشر يوم الخميس 2/12/1433هـ بصحيفة الرياض ضمن زاوية "بيت وصدى" والذي طرح مشكلة تشققات الطرق من خلال قصيدة نبطية شارك فيها عدد من الشعراء.

وأبدى ثناءه على ما صدر وعلى الشعراء المشاركين، موجها بطباعة كامل القصيدة وتوزيعها على موظفي ومسؤولي "نزاهة" ووضعها على الصفحة الرئيسية للموقع الإلكتروني للهيئة.

وبيت الشعر الذي طرح في الزواية يقول: "امداه يتزلت الشارع .. شهرين وتطيح بحفوره" ثم توالى صدى الشعراء عليه بعدة أبيات بدأت: "بالغش من زفلتة الشارع بارع.. عجل يبي يصرف فاتورة".. إلخ لتكتمل القصيدة..

ما امداه يتزفلت الشارع

شهرين وتطيح بحفوره

وهذا صدى البيت من الشعراء

بالغِش من زفلتِه بارع

عجْل ٍ يبي صرف فاتورة

وللسطح من يستلم ذارع

وغِش الأٍساسات مطموره

اللي مشى شره إيصارع

وفي كل ْ حادث ثبت دورة

فهد بن عقيل الطويان . بريدة

السر يالشاعر البارع

معروف والحال مخبورة

لا صرت للحنظلة زارع

ما تجني الورد وزهوره

مقاول الباطن مخادع

مصدر خساير مع خطورة

عبدالعزيز الصالح - حائل

مقاول ما لقى رادع

طبايع دوم مخبورة

مراقبه ما خفى ضايع

إهمال ومضيّع دوره

عمل مقاول مهو نافع

أموالنا كيف مهدوره

محمد بن عبدالعزيز الخنيفر - أشيقر

أسبابه مقاول بارع

يقبض فلوس على دوره

يعطي المشاريع ويسارع

أسرع من مهدف الكورة

لي صار مسؤولها قارع

على الطبل فترقص بزوره

سعود بن عبدالعزيز الهزاع - نعام

وين انت يالشاعر البارع

ياراسم الحرف بشعوره

نبغاك في وضعنا تسارع

ببيات تغني عن الصوره

يوزع الموت فالشارع

وقبور الاجواد محفوره

عبدالله بن لافي - الرياض

لو كان متعهده رايع

زانت مماشيه بالصوره

الجهد في شغلهم ضايع

عن طيب الاشغال مقصوره

والغش بايامنا شايع

وبعض المشاريع مخطوره

علي رشيد الرشيد - رياض الخبراء

ياشوق عمهوجتن فارع

خلك معي بس فصوره

اللي دخل يسئل الطالع

اسرار بسر مستوره

سعد صنهات السهلي الدرعية

ياناس وش فيه ذا الشارع

توه مسفلت ودي حفوره

ماهوب معقول ذا واقع

هذا خطا فاضح نوره

ما تنفعه رقعة الراقع

ومن شاربه ضايع شوره

مبارك محمد بن طرجم - وادي الدواسر

متعرج ونازل وطالع

تحتار لو شفت له صوره

سبوعين وسبوع والرابع

تلقا الزفلتات مقشوره

بشوارع الشغل من تابع

ما شفت ليلن طفا نوره

مدري عن الوضع والواقع

يا جعل الاحوال مستوره

غنام مسعود القريني - نعا

من الجنوب أو ورى الفارع

ومن جدة لراس تنورة

سكن قديمه وبه صادع

وارواح واصوله مهدودة

والعيب ما كان متصادع

لو كل شخص بذل دوره

سعود عائش الحربي

ان جيت تحكي عن الواقع

شوارع الحي مدموره

المي باطرافها ناقع

تسعين حفره لماسوره

اسير الاهمال ياشارع

وين المراقب وماموره

الاسود هندي العنزي - الرياض

رئيس "نزاهة" يعجب بقصيدة نبطية ويوجه بتوزيعها على موظفيه.. القصيدة بالداخل